மதுரை மாவட்டத்தில் பாஜக மதுரை மாவட்ட செயற்குழு கூட்டம் நடைபெற்றது. இந்த கூட்டத்தின் வழியாக, “மதுரை பெரியார் பேருந்து நிலையத்திற்கு அன்னை மீனாட்சி பேருந்து நிலையம் என பெயரிட்டு அதன் தொடக்க விழாவிற்கு பாரத பிரதமர் மோடியை அழைத்து வரவேண்டும்.
பெட்ரோல், டீசல் விலையை குறைக்காத தமிழ்நாடு அரசுக்கு கண்டனம் தெரிவித்தல், மத்திய அரசு நிதியின் கீழ் செயல்படுத்தப்படும் திட்டங்களில் இந்திய பிரதமரின் புகைப்படம் இல்லாமல் செயல்படுத்தினால் அலுவலகத்தை முற்றுகை போராட்டம் நடத்துவது, தமிழ்நாட்டின் சட்டம் ஒழுங்கு சீர்கேட்டில் அவலநிலையை கண்டனம்” உள்ளிட்ட 10 தீர்மானங்கள் இயற்றப்பட்டது.
பின்னர் செய்தியாளர்களை சந்தித்த தலைவர் சரவணன் கூறியதாவது:
முல்லை பெரியார் அணையில் 142 அடி தண்ணீர் தேக்க வேண்டும். ஆனால் 138 அடியிலேயே இரவோடு இரவாக தமிழ்நாடு அரசு, கேரள அரசுடன் களவாணி தனமாக கைகோர்த்து திறந்து விட்டனர்.
மத்திய அரசு பெட்ரோல், டீசல் விலையை குறைத்ததை தொடர்ந்து இருபத்தி ஐந்து மாநிலங்களில் பெட்ரோல் டீசல் விலையை குறைத்துள்ளனர். ஆனால், தமிழ்நாடு அரசு குறைக்கவில்லை. விடியல் அரசு என்று கூறிவிட்டு மக்களுக்கு விடியல் இல்ல அரசாக உள்ளது. அதனை கண்டித்து இந்த வாரம் தமிழ்நாடு முழுவதும் பாஜக சார்பில் போராட்டம் நடத்த உள்ளோம்.
நான்கு வழிச்சாலை கொண்டு வந்த முன்னாள் பிரதமர் வாஜ்பாய்க்கு மதுரை விரகனூர் பகுதியில் வெண்கல சிலை அமைக்க வேண்டும். மதுரை பெரியார் பேருந்து நிலையத்திற்கு அன்னை மீனாட்சி பேருந்து நிலையம் என்ற பெயர் சூட்டுவதில் தவறுயில்லை. பலர் தங்களது பெயரை காலப்போக்கில் மாற்றுகின்றனர், அதைப்போலவே மாற்றிக் கொள்ளலாம்.
நமது தமிழ்நாடு முதல்வர் கூட பெயரை மாற்றியுள்ளார். அதனால் பெயர் மாற்றுவதால் எந்த பிரச்சினையும் இல்லை. மதுரை கோவில் நகரம் எனவே தமிழ்நாடு முதல்வர் பெரியார் பெயரை நீக்குவது தொடர்பாக பரிசீலிக்க வேண்டும்.
ஈவிகேஎஸ் இளங்கோவன் அரசியல் அகதி. அவர் பாஜக மாநிலத் தலைவர் அண்ணாமலை கடுமையாக விமர்சனம் செய்துள்ளார். காங்கிரஸ் கட்சி அவரை புறம்தள்ளி மறந்துவிட்டது. அவர் அரசியலில் உள்ளார் என்பதை பிறர் உணர வேண்டும் என்பதற்காக கடுமையாக பேசியுள்ளார். அவர் மதுரையில் கால் வைக்க முடியாது.அவரை தாக்கினால் ரூ.1 லட்சம் தருவதாக மதுரை மாநகர் பாஜக மாவட்ட தலைவரும் முன்னாள் சட்டமன்ற உறுப்பினர் டாக்டர் சரவணன் தெரிவித்துள்ளார்.
