பாதுகாப்பு படைகளில் சேவைபுரிந்து பணிநிறைவு பெற்ற ஓய்வூதியர்கள், குடும்ப ஓய்வூதியர்கள் ஆகியோருக்காக வேலூரில் நடைபெற்ற குறைதீர்ப்பு முகாமில் ரூ.1 கோடி மதிப்பிலான நிலுவை தொகையை ஆளுநர் ஆர்.என்.ரவி வழங்கினார்
ஸ்பார்ஷ் எனப்படும் திட்டத்தின் கீழ் முப்படை (ராணுவம்,கடற்படை, விமானப்படை) ஓய்வூதியதாரர்களுக்கு வருடாந்திர உயிர் சான்று அடையாளம் காணவும், அவர்களின் பல்வேறு ஓய்வூதியம் சார்ந்த குறைகளை தீர்க்கவும் ஒரு மாபெரும் முகாம் சென்னை பாதுகாப்பு கணக்குகள் கட்டுப்பாட்டாளர் அலுவலகம், தக்ஷின் பாரத் ராணுவ தலைமை அலுவலகம் மற்றும் வேலூர் மாவட்ட முன்னாள் படைவீரர் நல சங்கம் இணைந்து வேலூர் தொழில்நுட்ப பல்கலைக்கழகத்தில் உள்ள அண்ணா கலையரங்கத்தில் 21.12.2024 அன்று நடத்தப்பட்டது.
சிறப்பு விருந்தினர் தமிழ்நாடு ஆளுநர் திரு ஆர் என் ரவி, பாதுகாப்பு கணக்குகள் துறை சிறப்புத்தலைவர் டாக்டர் மயாங்க் ஷர்மா, தக்ஷின் பாரத் ராணுவ தலைமை அதிகாரி லெப்டினன்ட் ஜெனரல் கரன்பீர் சிங் பிரார், இந்திய கடலோர காவல் படை துணை தலைமை இயக்குநர் டி.தினகரன் ஆகியோர் இதில் சிறப்பு விருந்தினர்களாக பங்கேற்றனர். அவர்களை சென்னை பாதுகாப்பு கணக்குகள் கட்டுப்பாட்டாளர் திரு டி ஜெயசீலன் வரவேற்றார்.
ஸ்பார்ஷ் திட்டத்தில் உள்ள பல்வேறு சேவைகளை பற்றியும் அவற்றினால் பாதுகாப்பு ஓய்வூதியதாரர்களுக்கு ஏற்படும் நன்மைகளைப் பற்றியும் விரிவாக சிறப்பு பாதுகாப்பு கணக்குகள் துறை தலைவர் டாக்டர் மயாங்க் ஷர்மா விளக்கினார்.
முன்னாள் படை வீரர்களுக்கு அரசின் பல்வேறு உதவி திட்டங்களை பற்றியும் வேலை வாய்ப்புகளை பற்றியும் தக்ஷின் பாரத் ராணுவ தலைமை அதிகாரி லெப்டினன்ட் ஜெனரல் கரன்பீர்சிங் பிரார் பேசினார்.
இந்திய சுதந்திரப் போராட்டத்தில் வேலூர் மாவட்டத்தின் முக்கிய பங்கை நினைவு கூர்ந்த ஆளுநர் திரு. ஆர் என் ரவி, வேலூர் மாவட்டம் வீர பூமி என்று கூறினார். மேலும் நாட்டின் வளர்ச்சியிலும் பேரிடர் காலங்களில் நிவாரண பணிகளை மேற்கொள்வதிலும் பாதுகாப்பு படைகளின் முக்கிய பங்கை அவர் விவரித்தார்.
சுமார் 2100-க்கும் மேற்பட்ட முப்படை ஓய்வூதியதாரர்கள் மற்றும் குடும்ப ஓய்வூதியதாரர்கள் இம்முகாமில் கலந்து கொண்டனர். ஓய்வூதியதாரர்களின் குறைகள் மீது துரித நடவடிக்கை எடுக்கப்பட்டு ஓய்வூதிய நிலுவைத் தொகையாக சுமார் ஒரு கோடி ரூபாய்க்கு காசோலைகள் வழங்கப்பட்டன. மேலும் இவ்விழாவின் சிறப்பு அம்சமாக, தாய் நாட்டிற்காக ராணுவத்தில் பணிபுரிந்து வீரமரணம் அடைந்த பாதுகாப்பு படை வீரர்களின் குடும்பத்தினர் கௌரவிக்கப்பட்டனர்.
வருடாந்திர உயிர் சான்று அடையாளம் காணுதல், ஆதார் புதுப்பித்தல், ஒரே ரேங்க் ஒரே பென்ஷன் (OROP) போன்றவை தொடர்பான சந்தேகங்கள் மற்றும் குறைகள் தீர்த்தல்,ஸ்பார்ஷ் திட்ட விளக்கம் மற்றும் குறை தீர்ப்பு என பல்வேறு சேவைகளுக்கென்று குழுக்கள் தனித்தனியாக அமைக்கப்பட்டு முப்படை ஓய்வூதியதாரர்களுக்கு சேவைகள் வழங்கப்பட்டன.
Get real time update about this post categories directly on your device, subscribe now.
