தமிழக பாஜக இளைஞரணி சார்பில் இன்று மாநில செயற்குழு இளைஞரணி தலைவர் வினோஜ் செல்வம் தலைமையில் கூட்டம் நடைபெற்றது.
இந்தக் கூட்டத்தில் நடிகர் சூர்யாவை கண்டித்து தீர்மானங்களை நிறைவேற்றினர்.
பணக்காரர்கள் வீட்டு பிள்ளைகள் மட்டுமே மருத்துவர்கள் ஆக முடியும் என்று இருந்த நிலையை மாற்றி , திறமையான ஏழை மாணவர்களின் மருத்துவ கனவையும் நிறைவேற்றி வருகிறது நீட் நுழைவுத் தேர்வு .
இந்த நிலையில் தமிழக மாணவர்களை குழப்பும் வகையில் நீட் தேர்வுக்கு எதிராக நடிகர் சூர்யா அவர்கள் தொடர்ந்து உண்மைக்குப் புறம்பான தகவல்களை பரப்பி வருகிறார் . மேலும் ஒளிப்பதிவு திருத்த சட்ட வரைவு 2021 – தொடர்பாகவும் தவறான கருத்துக்களை நடிகர் சூர்யா பரப்பி வருகிறார் . தற்போது ஒரு திரைப்படத்தின் தணிக்கை சான்றிதழ் 10 ஆண்டுகளுக்கு மட்டுமே பொருந்தும் . இந்த விதியை மாற்றி ஒரு படத்தின் தணிக்கை சான்றிதழ் , அந்த படத்தின் ஆயுள் முழுக்க செல்லும் வகையில் திருத்தம் செய்யப்பட்டுள்ளது . கருத்து சுதந்திரம் என்ற பெயரில் , இந்திய இறையாண்மைக்கு எதிராகவோ , இந்திய பாதுகாப்புக்கு அச்சுறுத்தலை ஏற்படுத்தும் வகையிலோ , பொது அமைதிக்கு குந்தகம் ஏற்படுத்துகின்ற வகையிலோ , ஒரு குறிப்பிட்ட மதத்தையோ , ஒரு குறிப்பிட்ட இனத்தையோ , ஒரு குறிப்பிட்ட சமூகத்தையோ , தேசவிரோத கருத்துக்களையோ , கலாச்சார சீரழிவை ஏற்படுத்தும் கருத்துக்களையோ , நீதித்துறையின் மாண்மை சீர் குலைக்கும் வகையிலோ கருத்துக்களோ அல்லது காட்சிகளோ இருந்தால் , அந்த திரைப்படம் திரைக்கு வந்த பிறகும் , அதன் தணிக்கை சான்றிதழில் மாற்றம் செய்வதற்கோ அல்லது தணிக்கை சான்றிதழை ரத்து செய்வதற்கோ அதிகாரம் வழங்கப்பட்டுள்ளது . அதுபோல படத்தின் தன்மையை பொறுத்து ஏழு வயதுக்கு மேற்பட்ட அனைவரும் பார்க்கும் வகையில் யூ என்றும் , 7 வயதுக்கு மேற்பட்டவர்கள் பார்க்கும் வகையில் யூ / ஏ 7 பிளஸ் என்றும் , 13 வயதுக்கு மேற்பட்டவர்கள் பார்க்கும் வகையில் யூ / ஏ 13 பிளஸ் என்றும் , 16 வயதுக்கு மேற்பட்டவர்கள் பார்க்கும் வகையில் யூ / ஏ 16 பிளஸ் என்றும் பிரிக்கப்பட்டுள்ளது .
ஒரு படத்தின் இயக்குனரின் எழுத்துப்பூர்வமான அனுமதி இன்றி , அந்த படத்தின் சில பகுதிகளையோ , முழு படத்தையுமோ , அல்லது ஒலி , ஒளிப்பதிவையோ திருடக்கூடாது . அப்படி திருடினால் 3 மாதம் முதல் 3 ஆண்டுகள் வரை சிறை தண்டனையும் , குறைந்தபட்சம் லட்சம் ரூபாய் முதல் அந்த படத்தின் மொத்த தயாரிப்புச் செலவில் 5 சதவீதம் வரை அபராதமும் விதிக்க புதிய சட்டத் திருத்தம் வகை செய்கிறது . இதில் நடிகர் சூர்யாவுக்கு என்ன பிரச்சனை என்று தெரியவில்லை .
கருத்து சுதந்திரத்திற்கு என்ன ஆபத்து வந்தது என்றும் புரியவில்லை . இன்னும் சொல்லப்போனால் படைப்பாளிகளின் உரிமைகள் பாதுகாக்கப்படுகிறது . எனவே மோடி அரசு கொண்டு வரும் மக்கள் நல திட்டங்களையும் , சட்டங்களையும் வேண்டுமென்றே , உள்நோக்கத்துடன் சுய விளம்பரத்திற்காக தொடர்ந்து எதிர்த்து வரும் நடிகர் சூர்யாவை இந்த செயற்குழு வன்மையாக கண்டிக்கிறது .
நடிகர் சூரியா அவர்கள் , இத்துடன் இதை நிறுத்திக் கொள்ளவில்லை என்றால் , பாஜக இளைஞரணி சார்பில் உரிய நடவடிக்கை மேற்கொள்ளப்படும் என்பதை எச்சரிக்கையாக தெரிவித்துக் கொள்வதாக தெரிவித்துள்னர்.
மேலும் கட்சியின் அனுமதியோடு போராட்டத்தில் ஈடுபடவும் உள்ளதாக தெரிவித்தனர்.
