தென் ஆப்பிரிக்க அணிக்கு எதிரான இரண்டாவது டெஸ்ட் போட்டியில் இந்திய அணி 7 விக்கெட்கள் வித்தியாசத்தில் வெற்றிபெற்றுள்ளது. இதன்மூலம் டெஸ்ட் தொடரை 1 – 1 என்று சமன் செய்துள்ளது.
இரண்டாவது டெஸ்டில் முதலில் பந்து வீசிய இந்திய அணி அபாரமான பந்துவீச்சை வெளிப்படுத்தியது முகமது சிராஜ், டாப் ஆர்டர் வீரர்களான மார்க்ரம், எல்கர், டோனி டே மூன்று வீரர்களையும் ஓரிலக்க ரன்களில் வெளியேற்றி விக்கெட் வேட்டை நடத்தினார். 11 ரன்களுக்கே 3 விக்கெட்டுகளை இழந்து தென்னாப்பிரிக்கா தடுமாற, தன் பங்கிற்கு தானும் 2 விக்கெட்டை எடுத்துவந்த ஜஸ்பிரித் பும்ரா கலக்கி போட்டார்.
தொடர்ந்து அசத்தலான பந்துவீச்சை வெளிப்படுத்திய முகமது சிராஜ், 9 ஓவர்கள் மட்டுமே வீசி 15 ரன்னை விட்டுக்கொடுத்து 6 விக்கெட்டுகளை வீழ்த்தி தென்னாப்பிரிக்கா மண்ணில் தன்னுடைய சிறந்த பவுலிங்கை பதிவுசெய்தார். 55 ரன்னுக்கே அனைத்து விக்கெட்டுகளை இழந்த தென்னாப்பிரிக்கா அணி சொதப்பல் ஆட்டத்தை வெளிப்படுத்தியுள்ளது
இந்நிலையில்தான் தென்னாப்பிரிக்கா அணி 34 ரன்களுக்கு 6 விக்கெட்டுகள் இருந்தபோது விராட் கோலி செய்த செய்கை வைரலாக பகிரப்பட்டு வருகிறது. இந்திய வம்சாவளியான கேசவ் மஹாராஜ் இந்த தொடர் முழுவதும் களமிறங்கும் போதெல்லாம் “ராம் சியா ராம்” பாடல் மைதானத்தில் ஒலிபரப்பப்படுகிறது. முந்தைய போட்டியில் “நீங்கள் பேட்டிங் செய்ய இறங்கும் போதெல்லாம் ராம் பாடல் ஒலிக்கிறதே” என கேஎல் ராகுல் கேட்க, அதற்கு ”ஆமாம்” என மஹாராஜ் சொன்ன வீடியோ வைரலானது.
https://x.com/Shibin_twitz/status/1742766337573998752?s=20
இந்நிலையில்தான் இன்று தென்னாப்பிரிக்கா அணி 34 ரன்களுக்கு 6வது விக்கெட்டை இழந்த போது, 7வது விக்கெட்டுக்கு களமிறங்க தென்னாப்பிரிக்க வீரர் கேசவ் மஹாராஜ் தயாராக இருந்தார். அப்போது அவர் களமிறங்குவதற்கு முன்பாக விராட் கோலி தனது கைகளை கூப்பி வணங்கி, வில்லில் நாண் ஏற்றி ஸ்ரீ ராமர் நிற்பது போல் போஸ் கொடுக்க, களத்தில் ‘ராம் சியா ராம்’ பாடல் ஒலிக்கத்தொடங்கியது. இந்த வீடியோ தற்போது இணையத்தில் வெளியாகி வைரலாக பகிரப்பட்டு வருகிறது.
